|
"Ons is almal net hier om vriende te maak, en te blikskud, natuurlik"
Die MiniHelde "crew" het onlangs ons MAD2 -toer, of soos dit meer algemeen bekend staan, JOOL-toer, saam met die manne van Helderberg ten bate van Maties Gemeenskapsdiens onderneem.
Maties Gemeenskapsdiens is die Matie inisiatief wat studente die geleentheid gee om 'n verskil te maak in die lewens van die minerbevooregtes in en om die Stellenbosch area. Van sopkombuise, skole bou en klimrame verf tot ondersteunings programme en opleiding word die program reg deur die jaar onderhou deur verskeie projekte waarby koshuise betrokke is.
Die langverwagte MiniHelde toer was een van daai dinge wat jou deur die eksamen gemotiveer het, dit was iets om na uit te sien, en die toer het beslis nie teleurgestel nie! Grootlike te danke aan ons eie meester braaier Louise Botha en Stefan Laing, hul bekwame komitee het ook handjie bygesit om seker te maak ons is almal goed gevoed en gelukkig.
Van Durbanville tot Hermanus het ons blikgeskud tot ons arms en bene lam was, ons het gedans, gesing, live bands bymekaar gebring, met ou ooms geflirt en selfs tannies se inkopiesakke gedra net vir nog R2, want jou blik moes vol. Na afloop van die toer kon ons vasstel dat jou blik die vinnigste oorloop by die N1 garage, 'n bar in Wellington en voor die Agrimark in Hermanus of as jy die puppy-dog-eyes-look baie oortuigend kan namaak.
Natuurlik moes ons sosialiseer ook! Die manne van Helderberg het ons beslis vermaak met hul gees en gasvryheid. Saans kon ons lekker saam kuier om die vuur, dit is ook waar die "matras groep" en DJ Halftrack hul eerste verskyning gemaak het, karakters wat beslis weer hul versyning tydens MAD2 sal moet maak!
Ongelukkig moet alle dinge tot 'n einde kom en moes ons paaie skei na n week se feesvierings, maar nie vir lank nie! Ons sien uit na MAD2 saam met die Swarras, ons kan letterlik nie wag nie! |
