Kultuurdag: ʼn Viering van verbondenheid

Op 12/06/2017 geplaas · In Dialogos, Jongste nuus, Ons tale geplaas

Internasionale studente wat die Taalsentrum se intensiewe Engels-program, die Intensive English Programme (IEP), volg, het Kultuurdag vanjaar op 18 Mei op ʼn besonderde en opwindende manier by die Khaya (Kruiskerk) gevier.

Die Verenigde Nasies het 21 Mei van elke jaar as Wêrelddag vir Kulturele Diversiteit vir Dialoog en Ontwikkeling verklaar, en op hierdie manier ʼn dag uitgesonder om ons die geleentheid te gee om die waarde van kulturele diversiteit beter te verstaan en om te leer hoe om in harmonie saam te leef. Die IEP-studente het die geleentheid aangegryp om hierdie dag by die Universiteit te vergestalt, waar studente van agt lande algemene konsepte van hul oortuigings, waardes en kulture verken het. Uitstallings in verskeie stalletjies het die kulture van die verskillende etniese groepe uitgebeeld, met die klem op groepe se gebruike, tradisies en kos.

Hierdie jaar het die graad 10-leerders van Rhenish Girls’ High School ook ingeloer. Die meisies was baie entoesiasties en dit het gelyk of hulle die interaksie met die IEP-studente terdeë geniet. Ons het baie positiewe terugvoer oor die geleentheid ontvang – hier is van die kommentaar:

“Kultuurdag was ʼn merkwaardige manier om van verskillende lande, kulture en tradisies te leer en veral om elke plek se plaaslike kos te eet (dit was ons gunstelingdeel van die uitstappie!). My oë het oopgegaan en ons was só bevoorreg om so ʼn skitterende geleentheid te kon bywoon.” (Caleigh Plaatjes)

“Die graad 10’s het dit vreeslik baie geniet om kos van verskillende lande te proe, soos akkerjellie van Suid-Korea, Chinese noedels en Switserse kaasfondue… Ons het baie pret gehad en sommer ook uitgeblink in die vasvra en danse, en met algemene kennis.” (Micaela Budge)

Ons Kultuurdag was ʼn geleentheid waarin studente en mentor-dosente baie ure belê het en iets wat tot stand gekom het deur nougesette beplanning, inoefenings en kruiskulturele spanwerk. Daarom was die uitkoms werklik merkwaardig, met pryse wat volgens spesifieke kriteria aan die top drie groepe toegeken is. Die voorstellings was ʼn wonderlike geleentheid vir die studente om met die gehoor te deel hoe hulle kultuur verstaan – ook hoe hulle hulself verstaan – en sodoende het hulle ook hul taalvaardigheid in Engels verskerp.