Meertalige pedagogieë in onderrig, leer en assessering: ’n DHOO-taalbeleidsprojek

’n Meertalige benadering tot onderrig, leer en assessering is belangrik om studente in staat te stel om medeskeppers van kennis te wees. Dit laat studente toe om uit hulle eie vloeibare taalrepertoires te put om aktief betekenis aan module-inhoud te heg.

Meertalige pedagogieë vervul ook ’n beduidende rol in die skep van ’n tuishoortgevoel in die hoër onderwys, wat op sy beurt akademiese uitkomste kan verbeter. Deur taaldiversiteit te erken en te inkorporeer, kan meertalige pedagogieë boonop koloniale invloede uit die kurrikulum help verwyder. ’n Meertalige benadering tot onderrig, leer en assessering skep inklusiewe leeromgewings waar studente hulle idees in enige taal kan verwoord, wat ’n ontvanklikheid vir uiteenlopende sienings bevorder. Daarom het hierdie benadering die transformerende potensiaal om ruimtes te skep waar alle vorme van kennis én studente se kulturele kapitaal erken en waardeer word.

Hierdie werksessie ondersoek meertalige pedagogieë, waaronder transtaling, om dosente toe te rus om praktiese strategieë te ontwerp sodat studente op ’n dieper vlak met kennis kan omgaan. Sodoende kan studente sowel epistemologiese as ontologiese toegang verkry tot die verskillende akademiese gesprekke in ons klaskamers.

Teikengehoor

Dosente en onderrigpersoneel