Tweede tuiste vir Nederlandse prof

Op 04/04/2019 geplaas · In Dialogos, Jongste nuus, Navorsing, Nuutste nuus, Ons tale geplaas

Hy was nog altyd gefassineer deur Suid-Afrika, sê prof Carel Jansen, Taalsentrum-navorsingsgenoot, wat in Maart weer op besoek hier uit Nederland was. Daarom dat hy die geleentheid aangegryp het om Suid-Afrika te besoek toe die Nederlandse Taalunie wisselwerking tussen Nederlandse en Suid-Afrikaanse universiteite wou begin bevorder in die middel 90’s. Hy het Stellenbosch, Pretoria en Johannesburg in 1996 vir die eerste keer besoek en sedertdien al amper 40 keer teruggekom. Die mense, die tale, die diere, die landskap en die kontraste – dit bly vir hom elke keer ʼn wonderlike ervaring. ʼn Gunsteling woord in Afrikaans? “Klopdisselboom”, sê hy.

In Nederland is Carel tans emeritusprofessor aan die Universiteit van Groningen in Kommunikasie en Inligtingstudies ná ʼn lang en suksesvolle loopbaan in die akademie. Hy het hom aanvanklik as taalkundige bekwaam en hom later toegespits op dokumentontwerp, leesbaarheid en gesondheidskommunikasie – onderwerpe wat hom steeds baie na aan die hart lê.

Sy verbintenis met die Taalsentrum dateer uit die laat 90’s en het gelei tot wedersydse gasdosentskappe vir hom en prof Leon de Stadler (Direkteur van die Taalsentrum op daardie tydstip) by hul onderskeie universiteite – in Carel se geval eers die Universiteit van Utrecht, toe die Universiteit van Nijmegen en nou Groningen. Hy was vroeër emeritusprofessor aan die US en is tans ʼn navorsingsgenoot aan die Taalsentrum, waar hy ʼn navorsingsprojek oor die ontwikkeling van ʼn nuwe leesbaarheidsformule vir Afrikaans lei. Hy en verskeie medewerkers – Taalsentrumpersoneellede en ander kundiges, ook van sy nagraadse Nederlandse studente – werk saam hieraan. Die projek nader nou die einde van die tweede data-insamelingsfase. Enigiemand in die Stellenbosch-area wat nog as respondent wil deelneem, word hartlik uitgenooi om met Susan Lotz te skakel.

Carel is ook een van die redakteurs van ʼn nuwe handboek oor professionele kommunikasie wat pas verskyn het, Communicate as a Professional, uitgegee deur Amsterdam University Press. Die boek is gebaseer op die Nederlandse handboek Leren Communiceren, waarvan hy ook ʼn mede-outeurs is, maar Communicate as a Professional is vir ʼn internasionale gehoor bygewerk. Lees gerus hier meer daaroor. Carel beplan om ʼn kortkursus oor professionele kommunikasie gebaseer op die boek saam met ons Kommunikasielab aan te bied wanneer hy Suid-Afrika weer in Oktober besoek. Verlede jaar het hy ʼn baie gewilde kortkursus oor vormontwerp hier aangebied, wat ook weer in Oktober sal plaasvind. E-pos gerus vir Michelle Pieters vir meer inligting oor die kursusse.