Professor vereer met internasionale toekenning vir die bewusmaking van kindertuberkulose

Dr Shoji Kudoh, die voorsitter van Japan se Anti-Tuberkulose Vereniging, oorhandig die Prinses Chichibu-toekenning aan professor Robert Gie
Prof Robert Gie, ʼn uitgelese professor in Pediatrie en Kindergesondheid aan die Fakulteit Geneeskunde en Gesondheidswetenskappe van die Universiteit Stellenbosch, is vereer met die Prinses Chichibu Internasionale Tuberkulose (TB) -gedenktoekenning vir 2015 ter erkenning van sy internasionale werk oor kindertuberkulose.

Hierdie jaarlikse toekenning word gedoendeur Japan se Anti-TB Vereniging (JATA), in samewerking met die International Union Against Tuberculosis and Lung Disease (IUATLD)s. Dit word toegeken aan iemand wat ʼn merkwaardig presteer in die internasionale stryd teen TB.

"Gie het ʼn leidende rol gespeel in die proses om kindertuberkulose wêreldwyd erken te kry," het dr Shoji Kudoh, die voorsitter van JATA, tydens die oorhandigingsplegtigheid gesê.

Hy het gesê Gie, ʼn pediatriese pulmonoloog met spesifieke belangstelling in navorsing en internasionale beleid oor kindertuberkulose, het ook baie jong dokters en studente gehelp deur internasionale opleiding oor kindertuberkulose en kinderlongontsteking aan te bied, veral in lande met ontoereikende hulpbronne.

Gie is erkenning gegee vir sy bydrae tot internasionale bewusmaking van kindertuberkulose in ʼn tyd toe dit beswaarlik erken is en as ʼn weeskindsiekte beskou is.

As voorsitter van die tegniese raadgewende komitee van die Wêreldgesondheidsorganisasie (WGO) se agentskap wat toegang tot TB-middels vergemaklik, het hy ʼn sleutelrol gespeel om TB-medikasie te verskaf aan kinders in lande wat nie kan bekostig om die middels in te voer nie.

Dié agentskap het onder meer toegesien dat gesubsidieerde TB-middels versprei is aan 200 000 kinders in lande in Afrika en Suid-Oos Asië wat nie kon bekostig om die middels in te voer nie.

Gie het ʼn sleutelrol gespeel in die opstel van die WGO se internasionale gesondheidsriglyne oor die behandeling van kindertuberkulose en het op internasionale vlak as voorsitter opgetree en as lid gedien van verskeie hoëvlakkomitees.

Gie het die toekenning verwelkom, maar gesê bewusmaking van TB onder kinders was ʼn spanpoging deur internasionale kollegas en kundiges.

"Ek voel bevoorreg om met soveel mense op internasionale vlak te kon saamwerk in die poging om te verseker dat kinders met TB erken raakgesien word en die regte behandeling kry. Dit is baie vervullend om om te sien hoeveel meer daar nou gedoen word om toe te sien dat kinders met TB behandeling kry.

"Daar is elke jaar ten minste een miljoen kinders in die wêreld wat TB kry. Hierdie kinders benodig kindervriendelike middels en beter diagnostiese toetse. Baie hindernisse moet nog oorkom word in die stryd teen kindertuberkulose, maar die nodige aandag en bestuur word nou daaraan gegee en die regte navorsing word gedoen.

Volgens die WGO sterf 140 000 kinders jaarliks aan TB, ʼn siekte wat genees kan word. In Suid-Afrika is 40 000 gevalle van kindertuberkulose in 2013 aangemeld.

Die toekenning is by die IUATLD se 46ste Wêreldkongres oor Longgesondheid in Kaapstad gedoen. Dit is deur JATA begin om wyle prinses Chichibu, ʼn lid van Japan se koningsgesin, se werk te vereer.

Prinses Chichibu het haar lewe gewy aan die voorkoming van TB nadat haar man, Prins Yasuhito na ʼn tienjaarlange stryd teen die siekte aan TB gesterf het. Prinses Chichibu het 55 jaar lank as die beskermvrou van JATA gedien.

Kudoh het gesê die toekenning weerspieël Prinses Chichibu se wens om die wêreld van TB te bevry.
Kim Cloete