Brief van die Primarius

Beste Huis Visser Eerstejaar

Baie geluk met jou plasing in Huis Visser. Ons sien baie uit om jou hier te verwelkom en jou deel te maak van ons trotse broederskap.

Huis Visser is tans die tweede kleinste manskoshuis op Stellenbosch met 211 inwoners. Ten spyte van ons klein getalle presteer ons op sport, kulturele en akademiese gebiede. Na die 2015 seisoen het elkeen van ons 3 groot sporte: Rugby, hokkie en sokker, almal ʼn liga opgeskuif. Ons rugby het die jaar vir die eerste keer in 5 jaar aan die Sauer-liga deelgeneem waarna ons 7de geëindig het. Ons sokker het ook uitstekend presteer en net-net in die finaal van die eerste liga verloor. Op kulturele gebied presteer ons ook goed met ʼn 3de plek in ons Vensters produksie die jaar na twee opeenvolgende 5de plekke in 2015 en 2014. Huis Visser se debat het die jaar ʼn algehele 2de plek behaal. Ons hou tans ook die toekenning vir die beste sport en akademiese koshuis in ons kluster.

Ons is natuurlik baie trots op ons prestasies en ons werk hard daaraan om elke jaar te verbeter, maar dit is nie noodwendig hoekom ek Huis Visser my huis noem nie. Ek is baie trots om te se dat Huis Visser ʼn baie hegte koshuis is. Dis is ʼn plek waar almal mekaar ken en elke individu aanvaar vir wie hy is. Dit is ʼn plek waar jy weet dat jy 210 broers het wat jou ondersteun. In Huis Visser sal jy vriendskappe vorm wat ʼn leeftyd sal duur. Ons waardes: Respek, Omgee, Erkenning en Eenheid deur Individualiteit, vorm die basis van als wat ons doen en hoe ons mekaar en ander hanteer. Ek hoop dit is duideliker vir jou dat Huis Visser nie net ʼn blyplek is nie, maar werklik ʼn huis is wat iets vir jou bied wat jy nie sommer op ʼn ander plek gaan kry nie.

Belangrike datum: 19 Januarie

– Aankoms by Huis Visser (8:00 – 12:00)
– Ouerete (12:30 – 14:00)

Die ouerete is ʼn geleentheid waar die HK en mentors aan die ouers en eerstejaars voorgestel word. ʼn Maaltyd, wat deur die koshuis verskaf word, sal ook bedien word. Verdere reëlings vir die verloop van die dag sal na die ete gegee word.

Ek moedig elke eerstejaar aan om ten minste die eerste 3 weke in die koshuis te bly voor jy vir die eerste keer huis toe gaan. Die eerste paar weke is uiters belangrik sodat jy maklik by die groep en die koshuis kan inskakel.

Besoek gerus ons webbladsy, www.huisvisser.co.za vir verdere inligting oor die koshuis. Daar is nie op die oomblik baie inligting nie, want ons is besig om die webbladsy op te dateer, maar ons hoop dat dit vinnig uitsorteer sal wees. Ek nooi jou ook uit om by die Facebook groep “Huis Visser eerstejaars 2017” aan te sluit sodat jy op hoogte kan bly van alles.

As daar enige probleme is of enigiets is wat jy of jou ouers wil weet. Kontak gerus enige van die  volgende persone.

Frikkie Strydom | Primarius | 079 864 6358 | 18240836@sun.ac.za

Estian Maree | Onder-Primarius | 083 269 1190 | 18190391@sun.ac.za

Werner De Wit | Inwonende Hoof | 072 698 1303 | wdw@sun.ac.za

Geniet jou vakansie, geseënde Kersfees en voorspoedige nuwe jaar vir jou en jou familie. Ek sien
baie uit om jou in Huis Visser te verwelkom! Sien jou 19 Januarie.

Vriendelike groete,
Frikkie Strydom.

#Huisvisser on Instagram

Load More


2017 Huis Visser Manskoshuis | ℵ Built with Love for HV by Cyclonic Creative Works