Ds Jacobus Stephanus (JS) Gericke is op 3 November 1911 in die George-distrik gebore en het in Ficksburg gematrikuleer voor hy letterkunde en teologie aan die Universiteit Stellenbosch (US) studeer het. Hy het sy voor- én nagraadse kwalifikasies met onderskeidings verwerf.

Voor hy by die moederkerk in Stellenbosch aangesluit het, het hy as predikant in gemeenskappe so ver as Uitenhage en Swellendam gedien. Hy het later in Stellenbosch by die sentrale gemeente aangesluit waar hy as studentedominee gepreek het.

Gericke was ook vanaf 1948 ’n raadslid van die US en is in Julie 1953 ná die afsterwe van dr Karl Bremer as visekanselier verkies. Hy het gedurende hierdie tydperk nie alleen nou saam met vier verskillende rektore gewerk nie, naamlik prof RW Wilcocks, prof HB Thom, prof JN de Villiers en prof MJ de Vries, maar het ook lewenslange vriendskapsbande met hulle ontwikkel.

Buite sy private gesinslewe het Gericke drie openbare passies gehad: die kerk, die land en die universiteit. Hy was voorsitter van die komitee wat die taak opgelê is om die Taalmonument in die Paarl op te rig, en was ook ’n trustee van die Jan Marais-beursfonds en Het Jan Marais Nasionale Fonds. Hierbenewens was hy lid van die Suid-Afrikaanse Akademie vir Wetenskap en Kuns en ’n direkteur van Volkskas en Ou Mutual.

* Deur Steyn du Toit