Leonore Bredekamp het die BAMus-graad aan die Universiteit van Stellenbosch behaal, en ook die MPhil in Moderne Vreemde Tale (met toespitsing op Tegnologie en Taalonderrig). As dosent is sy as multi-media spesialis verantwoordelik vir etnomusikologiese navorsing, en doseer musiektegnologie op eerstejaarvlak in die BMus-program. Sy is ook aktief betrokke by teaterproduksies en instrumentale ensembles as elektriese en akoestiese basghitaarspeler.
Annamarie Bam het die BMus- en BMus(Hons)-grade aan die Universiteit van die Vrystaat verwerf, onder die leiding van Harold Strebel in Kaapstad en Heinrich Armer in Bloemfontein. Sy is aangewys as die geheelwenner van die ATKV Forte-kompetisie, en die wenner van die Royal Schools of Music se buitelandse beurs. In Londen het sy verdere opleiding aan die Royal Academy voortgesit, onder John Davies, Richard Addison en Antony Pay, en ook meesterklasse onder Karl Leister in Londen en Guy Deplus in Nice bygewoon. Haar orkeservaring het reeds op ‘n vroeë ouderdom in Bloemfontein begin, met deelname aan blaasorkeste, en as ad hoc-lid van die SUKOVS-orkes. Sy was vir vier jaar eerste klarinettis van die Suid-Afrikaanse Jeugorkes. Met haar terugkeer uit Londen het sy by die Natalse Filharmonie aangesluit. In 1992 het sy ‘n onderwyspos aan die Bloemfonteinse Musicon aanvaar, en weer by SUKOVS aangesluit. As ‘n ervare kamermusikus het sy saam met die ‘Taffanel Trio’, die ‘Poulenc Players’ sekstet, duo-uitvoerings met pianis Elna van der Merwe, en deel van ‘n trio met Elna van der Merwe en Sabina Mossolow, tydens die Stellenbosse Woordfees (2016, 2018), en in Sasolburg met die ‘Trio Classique’, ‘n ensemble met Benjamin van Eeden (klavier) en Karen Gaertner (altviool). Annamarie gee ook tuisonderrig, en aan die Johnman Musieksentrum in Stellenbosch.
Daniel Prozesky het in 2010 ‘n voordraersdiploma van die Institut de Ribaupierre en in 2011 ‘n BMus-graad (dux, cum laude) van die Lausanne Konservatorium in Switserland, onder die leiding van die Switserse klarinettis Frédéric Rapin. Hy het reeds met die belangrikste plaaslike orkeste opgetree, en is sedert 2015 hoofklarinettis van die Kaapstadse Filharmoniese Orkes. As kamermusikus is hy bekend by Suid-Afrikaanse gehore, en sedert 2015 ook ‘n gereelde tutor en solis tydens die Stellenbosch Internasionale Kamerusiekfees. (Prozesky is ook ‘n gekwalifiseerde meganiese ingenieur, en ‘n vryskut-ontwerper in Kaapstad.)
Liesl Stoltz is ‘n oudstudent van die Universiteit van Stellenbosch, en het ook nagraadse studie in Frankryk en Italië onderneem, waar sy diplomas met onderskeiding behaal het. Sy het gestudeer onder leermeesters soos Éva Tamássy, Shigenori Kudo, Pierre-Yves Artaud en Peter-Lukas Graf, en was die wenner van etlike nasionale en internasionale kompetisiepryse, onder meer in Roemenië en Duitsland.
Stoltz het as solis saam met etlike plaaslike orkeste opgetree, soos die Johannesburgse en die KwaZulu-Natalse Filharmoniese orkeste, die Vrystaatse Simfonieorkes, die Universiteit van Kaapstad se Strykensemble, die Camerata Tinta Barocca en die Odeion Simfonia. In 2010 het sy die DMus-graad van die Universiteit van Kaapstad ontvang, en na-doktorale studies daar voortgesit. As uitvoerende kunstenaar het sy etlike lewendige uitvoerings gegee en opnames vrygestel: haar CD-vrystelling “Explorations – South African Flute music” (2017) is deur die Nasionale Instituut vir die Geesteswetenskappe en Sosiale Wetenskappe aangewys as die wenner. Liesl Stoltz is ‘n bekende fluitsolis en kamermusikus, en doseer ook aan die Universiteit se Musiekkollege. Haar instrument is ‘n 14k Yamaha fluit, en sy is ook aangewys as die Suid-Afrikaanse Yamaha Kunstenaar vir 2018.
Carina Venter het beide ‘n meesters- en doktorsgraad van die Universiteit van Oxford. Na voltooiing van ‘n junior navorsingsgenootskap by Merton College in 2017 (Universiteit van Oxford), het sy ‘n pos as lektrise in musiekwetenskap aan die Universiteit van Stellenbosch se Musiekdepartement aanvaar.
Janel Speelman is verteenwoordigend van die opkomende jonger geslag van Suid-Afrikaanse soprane wat hulle toelê op opera en kunslied. Onlangse uitvoerings sluit in dié tydens die Suidoosterfees, sowel as Niel Rademan se Heldinne-program tydens die Woordfees in Stellenbosch. Ms Speelman is ‘n alumnus van die Universiteit van Kaapstad, waar sy ‘n BMus-graad, en ‘n honneursgraad in kunsmusiek verwerf het, asook ‘n nagraadse diploma in opera, onder leiding van Proff Virginia Davids en Kamal Khan. Daarbenewens beskik sy oor ‘n meestersgraad van die Universiteit van Michigan se musiekskool. Ms Speelman is uitgenooi om op te tree tydens dié skool se prestigeryke jaarlikse uitvoering in die Kennedy Sentrum. Tydens haar studietyd daar het sy die Andrea Person- en George Shirley-beurstoekennings verower.
Lucinda Watts en Roché van Tiddens, twee oud maties is verloof. Die paartjie het mekaar in 2011 ontmoet by die konservatorium, waar hulle studeer het. Lucinda se spesialiteit rigting was musiek opvoedkundige, met klavier as hoof instrument. Sy het ook, onder andere, in die gemeenskap projek Jamestown Sounds vir minderbevoorregte kinders musiek les gegee. Roché het musiek komposisie onder leiding van, Hans Roosenschoon, gestudeer. Na afloop van sy meesters graad het Roché besluit om in Engeland verder te gaan studeer, waar hy ‘n nagraadse diploma in komposisie by die ‘Royal Birmingham Conservatoire’ behaal het. In tussen het Lucinda ‘n pos by Bastion Laerskool gehad as ‘n musiek onderwyseres, en is daarna ook saam met Roché na Engeland toe. Na ‘n jaar in Engeland het die paartjie na Den Haag, Nederland toe getrek waar Lucinda ‘n meesters graad in Musiek opvoedkunde by die ‘Royal Conservatory’ behaal het. Roché het ook ter selfde tyd die een-jaar kursus in Sonologie voltooi.
Vir Lucinda se meesters navorsing het die twee die musiek projek, Krabmuziek gestig (krabmuziek.wordpress.com). Die projek bestaan uit werkswinkels vir kinders. Met behulp van tasbare elektroniese klank generators, kan die kinders kreatief met klanke eksperimenteer en deur middel van verskeie komposisionele aktiwiteite hulle klanke in musiek omskep. Die projek is dus ‘n samesmelting van beide die twee se individuele belangstellings, elektroniese musiek komposisie en musiek opvoedkunde. Die werkswinkel behels dat deelnemers hulle eie elektroniese instrumente bou. Die instrumente bestaan uit eenvoudige toerusting soos batterye, luidsprekers en kontakt mikrofone. Na afloop van die werkswinkel voer die deelnemers die musiek wat hulle gemaak het uit, in ‘n klein konsert vir hulle ouers. Na die loods werkswinkel van agt deelnemers, het die projek ontwikkel en uitgebrei. In 2019 is Krab Muziek genooi om deel te neem aan die jaarlikse ‘Rewire’ musiek fees (https://www.rewirefestival.nl/artist/creative-sound-lab). Behalwe vir die Krab Muziek werkswinkels, het Lucinda ‘n private klavier studio en gee ook viool les by die ‘British School in the Netherlands’.
Roché werk op die oomblik aan ‘n nuwe komposisie, Dumelang, vir koor en live elektronika. Die komposisie is ‘n opdrag vir die ‘Haags Toonkunstkoor’, waarvan Roché ‘n lid is, wat vir 200 jaar lank al bestaan. Dumelang se teks bestaan uit hoe mense mekaar in de 11 amptelike tale van Suid-Afrika groet en die musiek maak gebruik van klank opnames uit die bosveld van ‘n natuur reservaat in die Limpopo provinsie. Die bedoeling van die teks is om die diversiteit van Suid-Afrika te vier. Dumelang sou as deel van die ‘75ste jaar bevrijdingsdag feest’ op die 5de Mei 2020 uitgevoer word, maar ongelukkig is die uitvoering as gevolg van COVID-19 uitgestel. Besoek gerus Roché se webwerf om na sy komposisies te luister (rochevantiddens.wordpress.com).
Die gelukkige paartjie beplan om in die Wes-Kaap in 2021 te trou.
In ooreenstemming met regeringsmaatreëls vir die bekamping van die corona-virus, word alle konserte en verwante aangeleenthede van die Eerste Seisoen (April-Junie) van die Endler Konsertreeks tot verdere kennisgewing uitgestel. Hierby ingesluit is Etensuurkonserte en die beoogde Klaviersimposium.
Ons sal jou op hoogte hou van enige verdere nuus ten opsigte van die heraanvang van ons konsertprogramme.
Ons wens jou en jou geliefdes die beste toe in hierdie onsekere tye.
Fiona
Op 3 Maart is `n nuwe CD van uitsonderlike belang in die Konservatorium aan die publiek bekendgestel. Dit is `n opname van Die Kruisiging, die eerste Johannes-Passie in Afrikaans, wat deur Winfried Lüdemann vir die vyfhonderdste herdenking van die Reformasie in 2017 gekomponeer is. Martin Berger, Senior Lektor in Koordirigering aan die Departement Musiek, was vir die opname verantwoordelik. Die uitsonderlikheid van die CD lê daarin dat `n professionele Duitse vokale ensemble onder Berger se leiding met vyf ervare Suid-Afrikaanse soliste saamgespan het om die werk op te neem. Die talle koorgedeeltes wat in die werk voorkom is deur die ensemble AmaCantus in Afrikaans ingestudeer en in Düsseldorf opgeneem, terwyl die solopartye gelyktydig deur die Suid-Afrikaanse sangers in Stellenbosch opgeneem is. Dr. Gerhard Roux, dosent in Musiektegnologie aan die Musiekdepartement, was vir die plaaslike komponent van die opname verantwoordelik. Die finale produk is in Duitsland saamgestel en word nou deur die Duitse CD-maatskappy Guma records wêreldwyd versprei. Houtskooltekeninge deur die Stellenboschse kunstenaar en oud-Matie Ydi Coetsee is spesifiek vir Die Kruisiging geskep en illustreer die CD se buiteblad en boekie.
By die bekendstelling het Berger die CD as `n uitmuntende voorbeeld beskryf van internasionale samewerking op artistieke en musiektegnologiese gebied tussen die Universiteit Stellenbosch en toonaangewende rolspelers in die buitelandse musiekbedryf. Hy het bygevoeg dat die Universiteit trots kan wees om aan `n projek van hierdie aard en omvang te kon deelneem. Dit illustreer dat ons kundigheid tegelyk plaaslik relevant en internasionaal mededingend is.
Die opname gee nie net wêreldwye blootstelling en erkenning aan een van die omvangrykste gewyde vokale werke wat tot nog toe in Afrikaans gekomponeer is nie, maar ook aan Afrikaans as musiektaal.
Belangstellendes kan die CD teen R180 by Fiona Grayer by concerts@sun.ac.za of tel. 021 808 2358 bekom.
Xander Kritzinger ‘n welbekende koormeester, tenoor and komponis van vokale musiek het sy musicale loopbaan begin as lid van die bekroonde Drakensbergse Seunskoor, waar hy later aangestel nis as studentedirigent.
Xander het sy meestersgraad in sanguitvoerend aan die Universiteit van Stellenbosch verwerf en sy studierigting plaas ‘n fokus op navorsing in die opleiding van seunstemme tydens stemverandering. Sedert 2008 is hy aangestel as voltydse koormeester van die Hoërskool Stellenbosch koor en van 2010 af is hy voltyds betrokke as sangdosent en musiekgeskiedenis- en musiekteorieopvoeder.
As tenoor tree Xander gereeld op saam met professionele vokale-ensembles soos die Cape Conor ten Kaapstad Solistekoor wat spesioliseer in vroeë musiek. Hy tree ook gereeld op as solis in groot werke soos die Hemelsvaart-Oratorium van JS Bach en GF Handel se Utrecht Jubilate.
Vanaf 2014 is Xander ook die koormeester van Viva Cantare gemeenskapskoor van Stellenbosch. In 2019 vestig hy die Stiellies-Kinderkoor, ‘n gemeenskapskoor vir laerskoolleerders van die groter Stellenbosch-omgewing.
