Uncategorized @af

corvin@sun.ac.za

Die dirigent, fluitis en gerespekteerde leermeester, Corvin Matei, is Professor in Fluit en Dirigeerkuns aan die Universiteit Stellenbosch. Hy is die stigter en Musiekdirekteur van die Kaapstadse Konsertorkes en die Musiekdirekteur van die Universiteit Stellenbosch Simfonieorkes.
Matei, ‘n Roemeniër van geboorte, het ‘n meestersgraad in uitvoerende musiek (fluit) aan die Boekarestse Musiekkonservatorium behaal. Gedurende sy studie het hy ook orkesdirigeerkursusse en meesterklasse onder vooraanstaande Roemeense dirigente bygewoon en aan internasionale feeste in Duitsland (insluitende Bayreuth), TsjeggoSlowakye, Bulgarye, Frankryk, Spanje en Italië deelgeneem.

Nadat hy sy graad verwerf het, het Matei ‘n oudisie by die George Enescu Filharmoniese Orkes afgelê, waar hy vervolgens aangestel is en vir sewe jaar onder dirigente soos Celibidache en Mazur gespeel het. In die sewe jaar by hierdie orkes het hy ook as solis saam met ander prominente orkeste in Roemenië opgetree en meer in die dirigeerkuns begin belangstel. Dit het hom Witold Rovitscki se Somermeesterklasse in Wenen en Sergiu Celibidache se Meesterklasse in Boekarest laat bywoon. Verder het hy verskeie opnames vir die Roemeense Radio en Televisie gedoen, terwyl die eerste prys in die Roemeense Nasionale Kompetisie van 1976 en 1983 aan hom toegeken is.
In 1983, nadat hy Roemenië verlaat het, het hy dirigeerkuns by professor Erich Kluge aan die Cologne Konservatorium studeer. Met die Cologne Kamerorkes se toer na die suide van Frankryk het hy beide as solis en dirigent opgetree.

In 1985 is Corvin Matei as eerste fluitis van die Kaapstadse Simfonieorkes aangestel, waar hy vir twaalf jaar uitvoerings gelewer het. In hierdie tydperk het hy ook in solokonserte saam met die Kaapstadse Simfonieorkes, die Kaaplandse Raad vir die Uitvoerende Kunste (Kruik) se Kamerorkes en die Bloemfonteinse Simfonieorkes opgetree. Vanaf 2001 was hy meer as ‘n jaar lank die eerste fluitis van die nuwe Kaapse Filharmoniese Orkes. Hy het ook opnames vir die SABC gedoen, en sy eerste CD, Music for Flute and Harp, was ‘n groot sukses. In dieselfde jaar het hy ‘n PhD aan die Universiteit van Kaapstad behaal.

Vanaf 1997, nadat hy onder Bernard Gueller (een van Celibidache se beste studente) gestudeer het, het Matei met ‘n druk dirigeerskedule begin. In SuidAfrika het hy die Johannesburgse Filharmoniese Orkes; die Kaapse Filharmoniese Orkes; die Universiteit Stellenbosch Simfonieorkes (wat in 2004 onder sy leiding die kategorie beste simfonieorkes uit 46 orkeste in die invloedryke Tygerbergse kompetisie verower het); die Kaapse Sinfonia; die Beau Soleil Simfonieorkes (waar hy van 2001 tot 2004 die hoof van die Departement Houtblaasinstrumente aan die Beau Soleil Musieksentrum was); en die Sans Souci Orkes (welke orkes onder sy leiding met die gesogte SAMROtrofee in die 1999 Eisteddfod bekroon is) gedirigeer.

In 2004 is dr Matei in die Departement Musiek aan die Universiteit Stellenbosch en as Musiekdirekteur van die Universiteit Stellenbosch Simfonieorkes aangestel. In dieselfde jaar het hy sy internasionale loopbaan as dirigent begin toe hy uitgenooi is om drie van Roemenië se voorste professionele orkeste te dirigeer. Sedertdien het hy al die groot Roemeense orkeste, sowel as orkeste in die Oekraïne en Bulgarye, gedirigeer. Corvin Matei is tans met ‘n druk dirigeerskedule in SuidAfrika en in die buiteland besig.

martens@sun.ac.za

Suzanne Martens studeer aan die Universiteit van Pretoria onder prof. Alan Solomon waar sy die grade BMus Uitvoerend en BMus Honneurs verwerf, albei cum laude. Sy sit haar studies in Holland voort onder Jan Repko (Academie Minerva, Groningen) en in Oostenryk onder Lavard Skou-Larsen (Mozarteum, Salzburg), waar sy lid was van die Salzburger Musici Kamerorkes. Sy het intussen ’n MMus-graad in kamermusiek (cum laude) aan die Universiteit van Stellenbosch verwerf, en is tans ingeskryf vir DMus aan die Universiteit van Pretoria.

Suzanne se eerste blootstelling aan ensemble- en orkesspel was onder wyle Betty Pack. Later was sy lid van Harmonia Juventia en Pro Musica, onder leiding van Alan Solomon en Weiss Doubell onderskeidelik. As student tree sy op as konsertmeester van die UP Simfonieorkes en die Nasionale Jeugorkes. Suzanne ontvang verskeie pryse, onder andere die Universiteit van Natal se 75ste Herdenkingsprys (1988) en die algehele eerste plek in die ATKV Forté-kompetisie (nou die Musiq-kompetisie) in dieselfde jaar. In 1991 is sy deel van die wentrio in die Oude Meester Kamermusiekkompetisie. Akademiese erekleure word op universiteit aan haar toegeken.

Benewens haar optredes as solis saam met al die vernaamste orkeste in die land, is Suzanne ’n aktiewe kamermusikus wat saam met verskeie ensembles verskyn het, ingesluit die Rosamunde Kwartet, die Allegri Trio, Schwietering Kwartet, Lyric Trio, die Amici Kwartet en die oorspronklike Kwartet vir Vrede. Sy tree by verskeie feeste in suidelike Afrika saam met hierdie ensembles op, en werk saam met gevierde kunstenaars soos Leslie Howard, Juliette Bausor en Steven Prutsman. Suzanne het ook al as deel van klavierduette en –trio’s gewerk saam met die pianiste Nina Schumann, Luis Magalhaes, Pieter Grobler, José Dias en Elna van der Merwe.

Vanaf 1994-2000 was Suzanne assistent-konsertmeester van die New Arts Philharmonic Orchestra Pretoria, en ook stigterslid van die Kamerorkes van Suid-Afrika. Sy tree op as konsertmeeter van die Kaapse Filharmoniese Orkes in 2001/2002 en sedert 2005 is sy gaskonsertmeester vir ongeveer die helfte van elke simfonieseisoen, en werk saam met dirigente soos Arjan Tien, Bernhard Gueller, Yasuo Shinozaki en Jonas Alber. Sy is ad hoc-lid van Camerata Tinta Barocca op barokviool.

Suzanne word in 2002 by die Universiteit van Stellenbosch aangestel en is tans senior lektor in viool. Saam met die tjellis, Peter Martens, lei sy die Stellenbosch Camerata, en is ook koördineerder van kamermusiek aan die US Musiekdepartement. Sy is fakulteitslid van die jaarlikse Stellenbosch Internasionale Kamermusiekfees, en het ook al as fakulteitslid by verskeie ander kamermusiekfeeste opgetree. Sy was verskeie kere op die beoordelaarspaneel van die Artscape Jeugmusiekkompetisie en tree as eksterne eksaminator vir die universiteite van die Vrystaat en Pretoria op. Sy word gereeld gevra om by kunswedstryde te beoordeel. Waar moontlik probeer Suzanne haar studente aanmoedig om hulle studies en musikale ervaring oorsee voort te sit.

bhve@sun.ac.za

Bennie van Eeden verwerf die Onderwysdiploma in Musiek, die grade BMus and HonsBmus cum laude aan die Universiteit van Stellenbosch.As student ontvang hy verskeie toekennings,onder andere die FAK-beurs (twee keer), die Konservatorium Stipendium, asook die Meriete prys vir die beste vierdejaarstudent aan die universiteit. Hy verwerf ook die LTCL en UVLM diplomas. Hy begin sy onderwysloopbaan as dosent aan die Wellington Onderwyserskollege, en word in 1988 aangestel as Lektor in Klavier aan die Universiteit van Stellenbosch, in die pos van sy eertydse klavierdosent, Betsie Cluver.

Mnr van Eeden sit sy klavierstudies voort onder vermaarde pianiste soos Lamar Crowson en Laura Searle (UK) asook John Antoniadis, wie as mentor optree vir sy praktiese M-eksamens. Hy neem ook aan internasionale klavierkompetisies in Bolzano (Italië) en Pretoria deel.

As veelsydige kunstenaar, is Van Eeden bekend vir solo- en kamermusiekuitvoerings, asook as lid van die hoogaangeskrewe Collage en Taffanel Ensembles, vir wie komponiste soos Hendrik Hofmeyr en Alexander Johnson spesiaal trio’s komponeer het. Hy is ook n gesogte begeleier en het o.a. saamgewerk met Marita Napier, Andre Howard, Sabina Mossolow en Julia Bronkhorst.

Mnr Van Eeden tree ook gereeld by die belangrikste kunstefeeste in Suid-Afrika op. Hy dien ook op gereelde basis in die Fakulteit van Internasionale klaviersimposia en kamermusiekfeeste op Stellenbosch. Hy is n stigterslid van die Hennie Joubert Nasionale Klavierkompetisie en is steeds intens betrokke by hierdie prestige musikale geleentheid as organiseerder en beoordelaar.

alimcd@sun.ac.za

Alistair McDonald se professionele loopbaan, wat oor meer as 30 jaar strek, is grotendeels gewy aan diens in die simfonie-, opera- en balletorkeste van Suid-Afrika, naamlik die voormalige KRUIK-orkes, Kaapse Simfonieorkes en Kwazulu-Natal Filharmoniese Orkes. Hy sluit hom in 2006 by die voltydse personeel van die Suid-Afrikaanse Kollege Hoërskool in Kaapstad aan, hoofsaaklik as koperblaasonderwyser en ensemble-afrigter vir die konsert- en jazzorkeste. In 2011 word hy by die musiekdepartement van die Universiteit Stellenbosch aangestel, waar hy voorgraadse trompetstudente onderrig. Hierbenewens onderrig hy sowel gemeenskapsmusikante as orkeslede van die SANW asook SAOG militêre orkeste wat ingeskryf is vir die Sertifikaatprogram in Musiekgeletterdheid by die kampusse van Stellenbosch en die SA Weermagorkes, Kaapstad. Hy tree steeds op ad hoc–grondslag saam met sowel verskeie plaaslike as nasionale orkeste op. Hy glo dat musikante moet voortgaan om musiek te maak so lank as wat hulle wil en kan.

simpson_leeroy@yahoo.com

Lee-Roy Simpson se vormingsjare in musiekopleiding begin op die ouderdom van 12 in die Nuwe Apostoliese Kerk, op blokfluit. Gedurende sy sekondêre skoolloopbaan, skryf hy in by die Beau Soleil Musieksentrum waar hy tromboononderrig ontvang van Pamela Kierman en Nick Green, en hooftromboonspeler in die Senior Simfoniese Blaasorkes en Verhoogorkes was.

Hy het aanvanklik ekonomie aan die Universiteit Stellenbosch studeer, maar skakel oor na musiek ná bywoning van die Stellenbosch Internasionale Kamermusiekfees in 2005. Na voltooiing van die Gevorderde Sertifikaat in Musiekgeletterdheid, skryf Lee-Roy in vir ‘n BMus met spesialisasie in kamermusiekuitvoering, wat hy in 2009 voltooi. Hy gaan voort met nagraadse musiekstudie en voltooi in 2010 ‘n BMus Hons in Repertoriumstudies, waar hy spesialiseer in die tenoor- en bastromboon en tuba.

Deur die loop van sy musiekstudies het hy talle musiekkursusse en feeste bygewoon en in 2009 ook na Duitsland en Oostenryk getoer saam met die MIAGI-orkes. Hy was ook ‘n lid van die Suid-Afrikaanse Nasionale Jeugorkes en het die Grahamstadse Nasionale Jeug-jazzfees in 2011 bygewoon waar hy as lid van die Noordsee Alumni Big Band opgetree het.

As kamermusikant het Lee-Roy al saam met baie koperblaasensembles regoor die Wes-Kaap op bastromboon en tuba opgetree. Hy is lid van die T-bone Trombone Quartet wat kategoriepryse in die Nasionale Ensemblekompetisie in sowel 2012 as 2014 verower het. As ad hoc-tromboonspeler het Lee-Roy saam met baie orkeste in Suid-Afrika gespeel, hoofsaaklik op bastromboon en tuba. Dit sluit in die Universiteit Stellenbosch Simfonieorkes en Simfoniese Blaasensemble, die Namibiese Simfonieorkes, die Con Spirito Simfonieorkes, WindWorx Simfoniese Blaasensemble, Kaapstadse Simfonieorkes en Kwazulu-Natal Filharmoniese Orkes.

Lee-Roy geniet dit om les te gee, en onderrig tans deeltyds koperblaasstudente by Bridge House (Franschhoek), Hoërskool Bellville, Wynberg Boys’ Junior School en Kronendal Musiekakademie in Houtbaai – ʼn gemeenskapsmusiekskool. Hy is in 2012 aangestel as deeltydse dosent aan die Universiteit Stellenbosch om tromboon, eufonium en tuba te onderrig aan voorgraadse koperblaasstudente en militêre orkeslede van die SANW- en SAOG- orkeste wat vir die Sertifikaatprogramme in Musiekgeletterdheid ingeskryf is by die SA Weermagorkes satellietkampus in Kaapstad.

Sean Kierman is gebore in Portland, Oregon, en ontvang sy opleiding in China, Pakistan, Indië en die Verenigde State van Amerika, waar hy sy BA voltooi aan die Antioch-Universiteit in Ohio. Hy sit sy nagraadse studies voort aan die Universiteit van die Witwatersrand in 1966-67, terwyl hy Franse horing speel in die SAUK-simfonieorkes en later die Durban Simfonieorkes, voor hy voortgaan met sy studies in politiek en sielkunde aan die Universiteit van die Oranje-Vrystaat. Hy was ’n sentrale figuur in die vestiging van die Vrystaat Instrumentale Program en die Vrystaatse Simfonieorkes. In 1979 aanvaar hy ʼn lektorspos aan die Universiteit van Port Elizabeth, waar hy die studieprogram in koperblaasinstrumente begin en uitbrei tot een van die grootste en suksesvolste koperblaaspraktyke in die land ten tyde van sy vertrek na Kaapstad in 1987. Hy word aangestel as senior lektor aan die Suid-Afrikaanse Musiekkollege van die Universiteit van Kaapstad in Julie 1987, waar hy die sameroeper van koperblaasstudies was, en bou ’n indrukwekkende ateljee van koperblaasstudente tydens sy ampstermyn. Hy doseer ook in akoestiek en dirigeer die Universiteit van Kaapstad Wind Symphony tot en met sy aftrede in Desember 2007.

Sean is komiteelid en dirigent van die semi-professionele simfoniese blaasensemble, WindWorx (gestig in 2005), en het hierdie ensemble al in talle uitvoerings regdeur die Wes-Kaap gedirigeer. Hy was dirigent van die Kaapse Filharmoniese Jeugblaasensemble vanaf 2004-2014, was dirigent en spesialis by talle Suid-Afrikaanse Nasionale Jeugorkeskursusse en is genooi om gemeenskapsmusiekorganisasies regdeur die Wes- en Oos-Kaap af te rig en vir hulle lesings aan te bied. Hy is voormalige president en huidige komiteelid van die Suid-Afrikaanse Horingvereniging. Tydens die 38ste Internasionale Horingsimposium van die Internasionale Horingvereniging in 2006, is die gesogte Punto-toekenning uit erkenning vir sy uitnemende bydrae tot en diens aan die kuns van horingspel en die onderrig daarvan aan hom toegeken. Sy huidige onderrigaktiwiteite sluit in die onderrig van koperblaasstudente aan die Universiteit van die Wes-Kaap se Sentrum vir die Uitvoerende Kunste, die opleiding van voornemende orkesleiers (“bandmasters”) asook koperblaasstudente wat ingeskryf is vir die sertifikaatprogram-, hoër sertifikaat-, diploma- en graadkursusse by die US Musiekdepartement, en hy rig ook die US Blaasensemble af en tree as hulle dirigent op. In 2014 is hy bekroon met die US Musiekdepartement se gesogte Parnassus-toekenning uit erkenning vir sy bydrae tot koperblaasonderrig in Suid-Afrika.

pkierman@sun.ac.za

Pamela Kierman verwerf die grade BMus aan die Universiteit van Port Elizabeth in 1983 en MMus aan die Universiteit van Stellenbosch in 2009. Sy het in haar voorgraadse jare veral as verwerker en begeleier met kinderteater en die RAD Ballet gewerk. As Fransehoringspeler was sy lid van die Prince Alfred Guard Band en eerste horing van die voormalige KRUIK-orkes in Port Elizabeth. Sy onderrig koperblaasinstrumente in die orkesprogram by Alexander Road Hoërskool vanaf 1986-1987 tot en met haar vertrek na Kaapstad waar sy aangestel is as koperblaasspesialis by Hoërskool Voortrekker in Julie 1987. Sy neem deel aan die opgradering van die SACC-orkes in Wynberg, nou die Suid-Afrikaanse Weermagorkes, gesetel te Youngsfield, Kaapstad en in 1991 word sy as koperblaasonderwyser by Hoërskool Plumstead aangestel waar sy aan die hoof staan van die musiekdepartement vanaf 1994-1998. Sy gee les by die Genesis Projek, ’n uitreikprogram van stapel gestuur deur Sean Kierman en Michael Blake aan die Universiteit van Kaapstad en was deeltydse koperblaasdosent by die South African College of Music van dieselfde universiteit.

In 1998 word sy aangestel as die hoof van koperblaasinstrumente by die Beau Soleil Musieksentrum waar sy werk tot en met haar aanstelling by die US Musiekdepartement in 2004. By die universiteit koördineer en gee sy les in die koperblaasdepartement, dirigeer die Stellenbosch Universiteit Simfoniese Blaasensemble en is intensief betrokke by die Sertifikaatprogram se plattelandse interaksieprojekte. As ad hoc horingspeler het sy opgetree saam met die Cape Sinfonia, die Kaapstad Kamerorkes, Windworx Simfoniese Blaasorkes, Con Spirito Simfonieorkes, die voormalige KRUIK-orkes en die Namibiese Simfonieorkes. Sy was ook al aktief as kamermusikus met uitvoerings as deel van koperblaaskwintette en horingkwartette regoor die Wes-Kaap. Sy is ondervoorsitter van die Suid-Afrikaanse Horingvereniging, komiteelid van die semiprofessionele simfoniese blaasensemble, Windworx, en voormalige adjunkpresident van die Wes-Kaapse tak van die Suid-Afrikaanse Vereniging van Musiekonderwysers.

Pamela werk uitvoerig op die gebied van gemeenskapsmusiek en beoordeel gereeld by gemeenskapsorkeskompetisies, bied werksessies aan met ‘buurtblaasorkeste’ (“community brass”) en konsulteer met gemeenskapsmusiekorganisasies oor aspekte soos befondsing, die skryf van voorleggings, lewensvatbaarheid, koperblaasonderrig, ens. Sy was voorsitter van die Fakulteit Lettere en Sosiale Wetenskappe se Gemeenskapsinteraksie- en Diensleerkomitee vanaf 2012-2015 en koördineer die finale jaar diensleermodule aan die US. Sy werk tans aan haar PhD aan die Musiekdepartment, Universiteit van Stellenbosch.

danellherbst@sun.ac.za

Danell Herbst sluit haar in Julie 2011 by die Musiekdepartement aan die Universiteit van Stellenbosch aan as lektor in musiekopvoeding, vakdidaktiek en gehooropleiding.

Sy voltooi haar BMus-studies (cum laude) in 2006 aan die Noordwes-Universiteit, Potchefstroom, waar sy spesialiseer in musiekteorie en klaviermetodiek. Haar finalejaardissertasie, onder leiding van Hannes Taljaard, hou ’n geїntegreerde benadering tot onderrigmateriaal vir musiekteorie voor. In 2011 verwerf sy die MMus-graad (cum laude) in musiekteorieonderrig en musiekopvoeding aan die NWU onder leiding van Hetta Potgieter en Seugnet Blignaut.

Danell het verskeie onderwysposte sedert 2001 beklee: onderwyser van verskeie instrumente by Bloemhof Gekombineerde Skool en Carletonville Hoërskool; studente- assistent en fasiliteerder vir voorgraadse musiekteoriemodules aan die NWU; ontwikkelaar en onderwyser vir die Isandla Usizo Musiek- & Lewensvaardigheidprojek by Potchefstroom Primêre Skool; onderwyser vir junior musiekstudie by Sonare Musiekakademie, Potchefstroom; ontwikkelaar, onderwyser en koördineerder van die musiekstudieprogram en musiekteorie-onderwyser by die NWU Musikhane Gemeenskapsprojek. Vanaf 2008-2011 doseer Danell deeltyds in musiekopvoeding en musieknotasie en -teorie aan die NWU.

Danell is lid van die volgende professionele groepe en verenigings: Suid-Afrikaanse Vereniging vir Musieknavorsing (SASRIM), Internasionale Vereniging vir Musiekopvoeding (ISME) en Suid-Afrikaanse Vereniging van Musiekonderwysers (SASMT).

Gedurende die eerste semester van 2008 was sy ’n uitruilstudent in musiekopvoeding aan die Universiteit van Jyväskylä, Finland. Sy het ook opgetree as trompetspeler in die Buzzin’ Brass Ensemble, die PUK Simfonieorkes en die NWU Musiekskool Blaas- en Jazzensemble.

Tans wy sy haar tyd aan die iProsper Projek by Rietenbosch Primêre Skool. Hierdie projek dien as gevallestudie vir haar PhD-navorsing oor die toepassing van die selfbeskikkingsteorie.

maberger@sun.ac.za

Martin is een van die gewildste, veelsydigste en suksesvolste Duitse koordirigente en kombineer artistieke praktyk en akademiese onderrig op ’n hoë vlak. Ná baie jare in diens as musiekdirekteur van die Würzburg-katedraal en professor in koorpedagogiek aan die Robert Schumann Musikhochschule in Düsseldorf, Duitsland, aanvaar Martin ’n aanstelling aan die Universiteit van Stellenbosch in 2013.

Martin studeer in Düsseldorf en Saarbrücken en verwerf grade in kerkmusiek, musiekopvoeding, musiekwetenskap, Duitse letterkunde en koorleiding. Deur meesterklasse en artistieke samewerking is hy blootgestel aan vooraanstaande Skandinawiese koordirigente soos Eric Ericson, Anders Eby en Gary Graden, wat sy benadering tot koormusiek betekenisvol beïnvloed het.

As musiekdirekteur aan die Würzburg-katedraal (2002-2013), het hy die katedraalmusiek ontwikkel tot een van die voorste instellings van sy soort in Duitsland. As professor in koorpedagogiek aan die Robert Schumann Hochschule in Düsseldorf vanaf 2008-2013, ontwikkel en leer hy moderne onderrigtegnieke vir koormusiek.

’n Besondere fokus van sy werk is op die gebied van kontemporêre en vroeë musiek.

Martin is verskeie kere vir sy prestasies bekroon. Met die kamerkoor wat hy aan die Würzburg-katedraal gestig het, wen hy die internasionale koorkompetisies in Malta (2007) en die gesogte Schubert-kompetisie in Wene (2008).

Martin is internasionaal gesog as gasdirigent, aanbieder van meesterklasse, gasdosent, beoordelaar en akademikus. Konserttoere, gaslesings en meesterklasse het hom al na byna alle Europese lande, Australië, China, baie Afrika-lande en die Verenigde State van Amerika geneem.

Sedert April 2013 doseer hy aan die Universiteit van Stellenbosch, waar hy ’n nuwe konsep vir opleiding in koorleiding ontwikkel en ook aan die hoof staan van die nuutgestigte Eenheid vir Vroeë Musiek.

Hy is onlangs as besoekende dosent aan die Ludwig Maximilian Universiteit se Instituut vir Musiekopvoeding in München aangestel en dien as adviseur vir die Internasionale Vereniging van Jeug- en Kinderkoorkunstenaars (WYCCAA).

Vir meer inligting oor Martin, besoek: www.martinberger.eu

Vir meer inligting oor Koorleiding aan die US: https://www.facebook.com/Choral-Conducting-at-Stellenbosch-University-432956236798449/?fref=ts

PUBLIKASIES

Berger, M. 2015. Nkosi sikelel’ iAfrika – Südafrika 20 Jahre nach Ende der Apartheid. Lehrer und Schule heute – Zeitschrift des Saarländischen Lehrerinnen und Lehrerverbandes, 66(5), May: 94-97. (ISSN 2190-5878)

Albrecht, C. & Berger, M. 2013. Todesnachrichten – Siegfried Koesler (1937-2012), Domkapellmeister in Würzburg von 1971 – 2002. Musik & Liturgie, 138(1), 49. (ISSN 1420-5409)

Sperling, O., Berger, M., Kiefer, T., Leenen, F., Schnell, J., Sichler-Karle, G. (eds). 2011. Singen von Gottes Wegen – Chorbuch Pueri Cantores III. Stuttgart: Carus-Verlag.

Berger, M. 2010. Architektur des Klanges – Die neuen Räume der Würzburger Dommusik, in J. Lenssen (ed). Architektur der Gegenwart in der Diözese Würzburg . Würzburg: Bau- und Kunstreferat der Diözese. 44-45

Gabriel, T. & Berger, M. 2006. Cantemus in viis Domini für Solostimme, Chor SATB, Oboe, Sopransaxophon, Fagott, Trompete in C, Posaune, Pauken, Vibraphon, 2 Violinen, Viola, Violoncello, Kontrabass und Rhythmusgruppe. Stuttgart: Carus-Verlag

Strauß-König, R. & Berger, M. 2002. Zeige uns den Weg für Chor SATB und Klavier. in: Chorbuch Unterwegs. München: Strube-Verlag

Strauß-König, R. & Berger, M. 2002. Zeige uns den Weg für Chor SATB und Klavier. in: Chorbuch Unterwegs. München: Strube-Verlag

Jansens, P. & Berger, M. 2002. Mit Maria preist den Herren für Chor SATB und Klavier. in: Chorbuch Unterwegs. München: Strube-Verlag

Stimmer-Salzeder, K., Reuß, A. & Berger, M. 2002. Wenn wir unsre Gaben bringen für Chor SATB und Klavier. in: Chorbuch Unterwegs. München: Strube-Verlag